هر آغاجدان بير ياپراق

هر آغاجدان بير ياپراق

9- اوستاد يحيي شيدا حضرتلري يئني بير حياتا قدم قويدو

 



 


 


 


ساري کؤينک


 


آي خسته قوش آواره گزيرسن بو دياري!


زنداندي قفسدي  چمني باغي باهاري


 


گوزله اؤزيوي اووچي دير هرياني بو يوردون


قوزغون کيمي دورد گوزلو گزير کؤرپه شيکاري


 


فرصت داليسيجا گزيري  ال يئري  تاپسا


ويران  قوياجاق  يوردونو  آي کؤينگي ساري!


 


تيک اؤز يوواني قويما سنه ال تاپا اووچي


سن بو يووانين صاحيبي سن،قان! يئنه باري


 


جهد ائيله کي جان قورتاراسان اووچي اليندن


دوشسن تورا فرياد ائله مه  چک  بو  فشاري


 


گولشنده کي يوخ ذوق و صفا آي ساري کؤينک


قاچ ! قاچ !  بو  يئرين  زهريليدير  داري  نداري


 


ديلله نسن  اگر  اووچي  ائدر  قانينا  غلتان


اوچسان  آ  يازيق!  تير  جفا  قلبيني  ياري


 


مين فيرتانا  قالخيب دؤيه جک  باشينا طوفان


هر کيمده  اولا   داغ کيمي  دونيادا  وقاري


 


گلسه باشيوا درد و بلا داغ کيمي  دور  باخ


آيديندي بو سؤز  توستو  گئده ر  گؤيچه يه  ساري


 


ايستر سني صياد اؤزونه  رام  ائـده آممـا


اويغو دا  گؤره ر  آج  تويوق  البته  کي  داري


 


بو ياخشي مثل دير کي بيزيم ائلده دئميشلر


بير  باخ  آشاغي  باخما  اوزوندن ده يوخاري


 


غم غصّه کيچيک قلبيني گر دؤيسه سيخيلما


بو گوند ه کئچر  آخيري  غملر ده  قوتاري


 


اوندا کي چيخار گون ياييلار عالمه بيردن


اوندا کي قارا دان يئري صبح اولجاق آغاري


 


داغي داشي آسوده خياليله گزه رسن


گولشنده نه شاختا گوره سن داغدا نه قاري


 


ظولمون ائوي ويران اولو ظاليم دوشر الدن


قان دورماز اگر کسسه بيچاق قيرسا داماري


 


بختين قاپيسي ايندي قيفيللانسا داريخما!


هر بير قيفيلين واردي طبيعت ده آچاري


 


اؤز جانيويلن اويناما بو عرصه ده « شيدا »!


ليلاج  دغلبازيله  قيزديرما  قوماري


............................................................................................


دئديم : آي غنچه دهن! کونلومو قان ائيله ميسن!


دئدي:بيجا يئره  عشقيمده  فغان  ائيله ميسن!


 


دئديم :انصاف ائله،اينجيتمه مني،عاشيقينم،


دئدي:گئت،سيرريمي دونيايا عيان ائيله ميسن!


 


دئديم :آغلاتما مني سرو بويون شوقونده،


دئدي:گوز ياشيني بيهوده روان ائيله ميسن!


 


دئديم : آخير گوزه ليم،باغ و باهاريم سنسن،


دئدي: سن عومرونو حسرتله خزان ائيله ميسن!


 


دئديم : آز چکمه ميشم گوزلرينين حسرتيني،


دئدي: اوز کونلونو يئرسيز نيگران ائيله ميسن!


 


دئديم : عشقينده اسيرم،منه بس خئيري نه دير؟


دئدي: اولده بو سئودادا زيان  ائيله ميسن!


 


دئديم : عشق آتشي نئيلر منه،قورخان دئييلم!


دئدي: بيچاره يانارسان نه گمان ائيله ميسن!


 


دئديم : آي گول،من ازلده نده گوزل عاشيقييم،


دئدي:  سن روحونو عشق ايله جاوان ائيله ميسن!


 


دئديم :هر گون سر-کويوندا دولانماقدير ايشيم،


دئدي: واحد،نه گوزه ل يئرده مکان ائيله ميسن!


 


علي آقا واحد


..............................................................................




آشيق آلي کيمدير؟


 


آشيق آلي  


  حق آشيقي و عدالتي تبليغ ائدن عرفان صاحيبي، صوفي شاعير آشيق آلي نين ياراديجيليغي ايله آشيق شئعيري نين يئني عؤمرو، يئني دؤورو باشلاندي.    


  1801-جي ايلده گؤيچه ماحالي نين قيزيل ونگ کندينده يوخسول بير عاييلهده دونيايا گلن آشيق آلي 19. عصر گؤيچه آشيق موحيطي نين ان اونلو صنعتکارلاريندان بيري اولدو.  


  جامالين شؤوقوندن ديليم اولدو تنگ، 


  چايدا باليق اولار، دريادا نهنگ، 


  ماحاليم گؤيچه دي، کنديم قيزيل ونگ، 


  آشيق آلي بيردير، بيره-بير گرک. 


     اوغلونون درراکه لي و حسساس بير اوشاق اولدوغونو ائرکن ياشلاريندان حيسس ائدن آشيق آلي نين آتاسي ميرزه کيشي اونو اوخوتماق قرارينا گلير. آلي موللاخانادا تحصيل آلسا دا، ايچينده اولدوغو آشيق موحيطي اونو داها چوخ چکير.  


  آلي نين گؤزل و ملاحتلي سسيندن خبر توتان آتاسي اوغلونو گؤيچه نين کرکيباش کندينده ياشايان آغ آشيغا شّييردليگه وئرير. 


  ايلک گونلردن شييردي نين فيطري ايستعدادا ماليک اولدوغونو دويان آغ آشيق آز مودتده بوتون ساز هاوالاريني آلييا اؤيره دير. 


  دئييلنلره گؤره، آشيق آلي بويو ايکي مئتردن اوجا، ائنلي کورک، ساريشين، قومرال گؤزلو بير آدام اولموشدور. ملاحتلي سسي، اولدوقجا شيرين لفظي، داستان سؤيله مک قابيليتي اونو اينسانلارا سئوديرميش، دؤورونون نادير شخصيتلريندن بيري کيمي آد-سان قازانديرميشدير. آشيق آلي نين سسي-سوراغي تئزليکله گؤيچه نين حودودلاريني آشير. اونون حياتي و آشيقليق فعاليتي ايله باغلي معلومات وئرن قايناقلاردان بيري  " آشيق آلي نين تورکييه سفري "  داستانيدير. آلي نين داستانداکي آشيق اوبرازي حاق آشيغيدير. کلاسسيک محبت داستاني تيپي ايله  " آشيق روايتي "  آراسيندا اورتا مؤوقئعده دايانان بو داستان آشيق حاقيندا يادداشلاردا ساخلانيلان بيلگيلرله زنگيندير.  


  داستاندا آشيق آلي نين گؤيچه ماحالي نين چاميرلي کندينده نيفتالي آدلي وارلي بير کيشي نين بستي آدلي قيزيني سئوديگيندن بحث ائديلير. باشليغي وئره بيلمه ين آلي ناخچيوانا، تورکييه يه سفر ائديب بو دييارلاردا آشيقليق ائدير. سئوگيليسينه ايکي ايله گله جگيني دئسه ده، همين مودتده آشيق آلي وطنه دؤنه بيلمير. قوربتده هم يئرليلريندن بيرينه راست گلن آشيق  " دئيينن "  رديفلي قوشماسيني يازيب گؤندرير: 


  قاصيد، گئدر اولسان بيزيم ائللره، 


  بو نامه ني او جانانا دئيينن. 


  قوهوم-قارداش، دوست-موصاحيب اولانلار، 


  گؤز ديکمه سين باشقا يانا دئيينن. 


      قيزين آتا-آناسي اونو زورلا باشقاسينا اره وئرمک ايستسه لر ده، آشيق آلي دوغما وطنينه سئوگيليسي نين تويونون باشلانديغي گون گليب چاتير و داستان خوشبخت سونلوقلا بيتير.  


   " آشيق آلي و اسمر خانيم "  داستاني ايسه  " آشيق آلي نين تورکييه سفري "  داستاني نين واريانتيدير. 


      آشيق آلي گؤزل شاعير اولماقلا ياناشي، هم ده ساز هاوالاري نين ميثيل سيز ياراديجيسي کيمي تاريخه دوشوب.  " گؤيچه شريلي " ،  " گؤيچه گولو " ،  " آغير شريلي " ،  " گؤيچه قايتاغي " ،  " قهرماني " ،  " ائل باياتيسي "  ( " کؤچ باياتي " )،  " گيله نار "  ساز هاوالاري نين آشيق آلي طرفيندن ياراديلديغي هئچ کيمه سيرر دئييل. 


  اونون عظمتلي و مؤحتشم پوئتيک دوهاسي اينسان گؤزلليگيني، هارمونييا و آهنگدارليغي موکممل صنعت نومونه سي کيمي تقديم ائتمه يه ايمکان يارادير.  


  سوسنلي، سونبوللو، تر بنؤوشه لي، 


  يايلاق، بيزيم يايلاقلارا بنزرسن.  


  ايچن اؤلمز سنين کؤوثر سويوندان، 


  بولاق، بيزيم بولاقلارا بنزرسن. 


   آشيق آلي ياراديجيليغيندا صميمي اينسان حيسسلريني يوکسک صنعتکارليقلا قلمه آلير: 


  ايستکلي سئوگيليم، گلديک اوز-اوزه، 


  اليمي الينه آل گوله-گوله. 


  چوخ گزديم دونياني، سئچه بيلمه ديم 


  سنين تک گؤزلدن، آل گوله-گوله.  


  آشيق آلي نين اؤز دست-خطي ايله يازديغي اوچ کيتاب اليازماسي شئعيرلري و اوستادي آغ آشيقدان يازديغي بير کيتاب اليازماسي 1938-جي ايله دک کلبجرده  " ديلسوز و خزانگول "  داستاني نين مؤليفي آشيق نبي نين شخصي آرخيوينده ساخلانسا دا، تأسوف کي، بو نادير نوسخه همين ايل آنلاشيلمازليق اوزوندن يانديريلميشدير.  


  آشيق آلي نين 20-دن چوخ شّييردي اولدوغو دا معلومدور. آشيق علسگر، آشيق مئهدي، آشيق محمد، آشيق هوممت کيمي قودرتلي صنعتکارلار اوستادين اليندن سو ايچميش، اؤزلري ده اوستادليق سويييه سينه يوکسه ليب، اوستادلاري نين اوزونو آغ ائتميشلر.  


  بو گون بير حيکمت گؤرموشم 


  عالمه ايمان وئرير، 


  يئديگي تکرار يئييلير، 


  هاميسيني تامام وئرير. 


  اؤزو عالمي دويورور، 


  ناله چکير، آجام من، 


  اونون نه کي يئمگي وار، 


  جمعيني اينسان وئرير. 


     آشيق آلي بؤيوک تجنيس اوستاسي اولدوغوندان ائل آراسيندا اونو  " تجنيس آلي " ،  " لوغمان آلي " ،  " دده آلي " ،  " شيخ آلي "  دا دئيه چاغيرارميشلار. آشيغين ادبي ايرثي بوتؤولوکده بيزه گليب چاتماسا دا، الده اولان قوشما، تجنيس، تصنيف، باياتي، گرايلي، اوستادنامه، دئييشمه لرين هر بيري اصيل صنعت نومونه سيدير: 


  هاوالانما، دلي کؤنول، 


  زورونان ايشين ندي؟ 


  منصور تکي حلبده 


  دارينان ايشين ندي؟ 


  توت اوروجون، قيل نامازين، 


  شوکور ائت آللاهينا، 


  يوخسولسان، آلچاقدان يئري، 


  وارنان ايشين ندي؟ 


      دئييلنلره گؤره، آشيق آلي عؤمرونون آخيرلاريندا دونيا ايشيغينا حسرت قالميش، اؤز ايشيقلي سؤز دونياسيندان دونيايا بويلانميشدير. 


   چکمه خجالتي، اونوتما عاري، 


  ساخلا بو سينه ده عار، آشيق آلي. 


  بير زامان آقيلديم، باشدا اَيلشن 


  ايندي ده آياقدا کور آشيق آلي. 


     1911-جي ايلده دونياسيني دييشن صنعتکاردان گله جک نسيللره بؤيوک بير ايرث ميراث قالدي. آشيق آلي هم ده تاريخه آغ آشيغين شّييردي، آشيق علسگرين اوستادي کيمي دوشدو. بو اوچ صنعتکار - آغ آشيق، آشيق آلي، آشيق علسگر 19. عصر آشيق ادبياتي نين اوچ گئديشلي-گليشلي، ابدي يولونا چئوريلدي.  


  ترانه واحيد -  مدنيت آز


.....................................................................................................................


ائله باغلي


 


ائلين کسکين ديلي دئييرلر منه


ائليمدن آيريلماز گوزلريم منيم


سيزقين بولاق کيمي سس سيزدن آخار


جيزمالار آلتيندان سوزلريم منيم


ائلين ايسته کي دير منيم ايسته گيم


ائل دير آرزيلاريم ائل دير ديله گيم


ائلين سورفاسيندان گلير چوره گيم


ائليمه باغلي دير هنريم منيم


دوشمان اوستوموزه آياق آلاندا


آنا يوردوم آياق آلتدا قالاندا


ايگيت لر آتلانيب هاي – کوي سالاندا


ائلين دوعاسي دير سنگريم منيم ...


 


عباس بارز


...............................................................................


 آراسيندا


 



تزه آشناليقلا کؤحنه دوستلوغون
فرقي وار قيش ايله ياز آرا‌سيندا.


نامردده قايدادي: کسر باسديغين,
هر کس حساب چکسين اوز آرا‌سيندا.


قودرت‌دن اوجالان ظلم ايله ائنمز,
حاق‌دان يانان چيراق باد ايله سؤنمز.


دوست دوست‌دان اينجيير, قلبينده دؤنمز,
اولار بير آز ارکي ناز آرا‌سيندا.


علسگرم, غم و مؤحنتدي يوکوم,
فيل چکمز بو دردي, من نئجه چکيم?!


حاق ايله ناحاققي آختاران حاکم
تاپار قولاق ايله گؤز آرا‌سيندا.


 


 


عاشيق علسگر


.........................................................................




  باياتي

 


لاي لاي بئشيگيم لايلاي


ائويم-ائشيگيم لايلاي



سن يات شيرين يوخودا


چکيم کئشيگين لايلاي


  


عزيزي يم سا لما سـا


خوي دان گئدرسالماسا


بنـده بنـده يه نـئـــيلـر


آلــلاه گـؤزدن سالما سا





عزيزي يم بيــرده من


دولدور ايچيم بيرده من


عؤمر آزالدي گون کئچدي


جاوان اولمام بيرده من




عزيــزيم وطن ياخشي


گئيمگه کتــان ياخشي


گزمگه غريـب اؤلـکه


اؤلمگه وطــن ياخشي




عزيــزيم الميــــم وار


گوموشدن قلمـيـــم وار


ياخيـنــا گلنـميـــــــــرم


اوزاقـدان سلاميـــم وار




عزيــزيم مرده سـاري


سو گلـــر بنـده ساري


باغلاسالار قول قيچيـم



سوروننم مـرده ساري


 


باغلارين باري منـدن


هئيواسي ناري مندن


اولـدورسز آه دئمـــرم


آلمايين يـــاري مندن





بو باغـــلار آلما ليــدي


آلماسي قا لما ليــدي


بوردا بير يار سئوميشم


قاداسـي آلما ليـــدي




سؤزو سؤزدن آلان وار


زولفو اوزه سالان وار


گئدن اوغلان تئز قاييت


گؤزو يولدا قـالان وار!


..........................................................


 



 فرياديمه يئت !



 


دوشدوم گئنه مئيخانه‌ده خوش هنگلر ايچره,


گؤردوم گئنه بير رنگ ايله گول رنگلر ايچره.


صد شوکر کي, ايمداد قيليب بختي-همايون,


بير ديز يئري تاپديم اؤزومه شنگلر ايچره.


اي مئيدن ائديب توبه‌, ائدن بنگله اولفت,


ديوانه کيمي دوشمه عبث دنگلر ايچره.


نه نقل, حکايتدي, نه افسانه و افسون,


بو بخل حسددير کي, دوشوب يئنگيلر ايچره.


اي صاحب شمشير دودم, شاه جهانبخش,


اي کشته‌لري پشته قيلان جنگلر ايچره.


بو  ملک قراداغ دا   بي مونس و غمخار,


فرياديمه يئت, قويما مني ننگلر ايچره.


مجنون کيمي اوريان و دل آزرده و محزون,


داغدان داغا گزگز گزه‌رم سنگلر ايچره.


عشق اهلي سانيب ساليک ايله همسفر اولدوم,


گزديم بير-ايکي شام و سحر لنگلر ايچره.


بو کوچه‌ي عشقين, بيليرم, غايتي يوخدور,


بيچاره نباتي قالاجاق تنگلر ايچره.


 


سيد ابوالقاسم نباتي


..............................................................................................




 


 


نظرات کاربران
X
در صورت مشاهده مطالب مغایر با قوانین و شعونات اسلامی از بخش ارتباط با ما گزارش دهید تا سریعا حذف گردد